Rəqəmsal Marketinqdə SMART Məqsədlər və Düzgün İstifadə Qaydası

Rəqəmsal marketinq fəaliyyətini həyata keçirən zaman uğurlu olmaq üçün düzgün strategiya və aydın məqsədlərin seçilməsi önəmlidir. Rəqəmsal marketinq fəaliyyəti zamanı “satışları artırmaq” və ya “daha çox müştəri cəlb etmək” kimi ümumi hədəflər üzrə KPI-lar təyin etmək kifayət etmir. Bu zaman SMART məqsədlər köməyimizə çatır.

SMART məqsədlərin nə olduğunu, onların rəqəmsal marketinq strategiyasında necə istifadə edildiyini və niyə vacib olduğunu nəzərdə keçirək.

SMART Məqsədlər Nədir?

SMART, beş əsas xüsusiyyəti təmsil edən bir akronimdir: Spesifik, Ölçülə bilən, Əldə edilə bilən, Uyğun və Zamana bağlı. Hər birini gözdən keçirək:

Spesifik (Specific)

Məqsədiniz dəqiq və aydın olmalıdır. “Satışları artırmaq” əvəzinə, “Gələn rüb ərzində onlayn satışları 20% artırmaq” kimi spesifik bir hədəf seçmək.

Ölçülə bilən (Measurable)

Məqsədinizin irəliləyişini izləyə bilmək üçün onu ölçə bilməlisiniz. Məsələn, “Sosial media izləyicilərini artırmaq” əvəzinə, “Instagram izləyicilərimizi 6 ay ərzində 10,000-dən 25,000-ə çatdırmaq” seçə bilərik.

Əldə edilə bilən (Achievable)

Məqsədləriniz çətin, lakin realist olmalıdır. “Bir ay ərzində 1 milyon yeni müştəri qazanmaq” əvəzinə, “Növbəti 3 ay ərzində müştəri bazamızı 15% artırmaq” kimi əldə edilə bilən bir hədəf semilməlidir.

Uyğun (Relevant)

Məqsədləriniz ümumi biznes strategiyanızla uyğun olmalıdır. Əgər hədəfiniz premium müştərilərə xidmət etməkdirsə, “Ucuz məhsulların satışını 50% artırmaq” kimi bir məqsəd biznesinizə uyğun olmayacaq.

Zamana bağlı (Time-bound)

Hər məqsədin aydın bir zaman çərçivəsi olmalıdır. “Veb sayt trafikini artırmaq” əvəzinə, “Növbəti 6 ay ərzində aylıq veb sayt ziyarətçilərini 50,000-dən 100,000-ə çatdırmaq” kimi seçim etmək olar.

Rəqəmsal Marketinqdə SMART Məqsədlərin Əhəmiyyəti

SMART məqsədlər rəqəmsal marketinq strategiyanızın əsas təməlini təşkil edir və bir çox səbəbdən vacibdir:

• Aydınlıq təmin edir: SMART məqsədlər komandanıza dəqiq nə əldə etmək istədiyinizi bildirir
• Motivasiya yaradır: Ölçülə bilən və zamana bağlı hədəflər komandanızı daha çox səy göstərməyə təşviq edir
• Resursları fokuslaşdırır: Spesifik məqsədlər sizə resurslarınızı düzgün yönləndirməyə kömək edir
• Proqresi izləməyə imkan verir: Ölçülə bilən məqsədlər sayəsində irəliləyişinizi asanlıqla izləyə bilərsiniz
• Strategiyanı təkmilləşdirməyə kömək edir: Nəticələri ölçərək strategiyanızı daim yaxşılaşdıra bilərsiniz

SMART Məqsədlərin Rəqəmsal Marketinq Strategiyasına Tətbiqi

SMART məqsədlərin əhəmiyyətini başa düşdükdən sonra, onların rəqəmsal marketinq strategiyasına necə tətbiq oluna biləcəyinə göz ataq. Müxtəlif rəqəmsal marketinq kanalları üçün SMART məqsəd nümunələrinə baxaq:

Veb Sayt Trafikini Artırmaq üçün SMART Məqsəd

“Veb sayt trafikini artırmaq” əvəzinə belə bir SMART məqsəd seçə bilərsiniz:

“Növbəti 6 ay ərzində orqanik axtarış trafikini 30% artırmaq, bunun üçün hər həftə iki SEO-optimizasiya edilmiş bloq yazısı dərc etmək və ayda ən azı 5 yüksək keyfiyyətli backlink əldə etmək.”

Bu məqsəd spesifikdir, ölçülə biləndir (30% artım), əldə edilə biləndir, biznesiniz üçün uyğundur və zamana bağlıdır (6 ay).

🔍 A-dan Z-ə SEO haqqında məlumat əldə et.

Sosial Media Əlaqə Dərəcəsini Artırmaq üçün SMART Məqsəd

Sosial media strategiyanız üçün belə bir SMART məqsəd müəyyən edə bilərsiniz:

“Növbəti 3 ay ərzində Instagram səhifəmizdə engagement (qarşılıqlı əlaqə dərəcəsi) nisbətini 2%-dən 5%-ə qaldırmaq. Bunu həyata keçirmək üçün gündə ən azı 2 Story paylaşmaq, həftədə 5 əsas post etmək və hər gün 30 dəqiqə izləyicilərlə qarşılıqlı əlaqədə olmaq.”

Bu məqsəd konkretdir, ölçülə biləndir, realistdir, sosial media marketinq strategiyanıza uyğundur və müəyyən bir zaman çərçivəsi var.

🤳 SMM Nədir? və SMM Menecer Kimdir? Bu anlayışları kəşf edin!

E-mail Marketinqi üçün SMART Məqsəd

E-mail marketinq kampaniyanız üçün aşağıdakı kimi bir SMART məqsəd təyin edə bilərsiniz:

“Növbəti rüb ərzində e-mail abunəçilərimizin sayını 10,000-dən 15,000-ə çatdırmaq və emaillərin oxunma nisbətini 20%-dən 25%-ə yüksəltmək. Bunu etmək üçün veb saytımızda pop-up formaları təkmilləşdirmək, hər həftə bir premium kontent təklif etmək və ayda bir dəfə vebinar keçirmək.”

Bu məqsəd spesifik rəqəmlər təyin edir, ölçülə biləndir, müəyyən müddət ərzində əldə edilə biləndir və e-mail marketinq strategiyanıza uyğundur.

✉️ E-mail marketinq haqqında geniş təlimatı nəzərdən keçirin.

PPC Kampaniyaları üçün SMART Məqsəd

PPC (Pay-Per-Click) reklamları üçün belə bir SMART məqsəd qoya bilərsiniz:

“Gələn ay ərzində Google Ads kampaniyamızın konversiya (dönüşüm) nisbətini 2%-dən 3%-ə yüksəltmək və eyni zamanda ortalama klik qiymətini (CPC) 0.50 AZN-dən 0.40 AZN-ə endirmək. Bunu həyata keçirmək üçün hədəf açar sözlərimizi yenidən nəzərdən keçirmək, reklam mətnlərimizi A/B test etmək və hədəf auditoriyamızı daha da dəqiqləşdirmək.”

Bu məqsəd spesifik hədəflər müəyyən edir, ölçülə biləndir, bir ay ərzində əldə edilə biləndir və PPC strategiyanıza tam uyğundur.

🎯 Marketinq Strategiyası və SMM Strategiyasının düzgün hazırlanma qaydasını öyrənin!

SMART Məqsədlərin İzlənməsi və Qiymətləndirilməsi

SMART məqsədlər təyin etmək yalnız ilk addımdır. Bu məqsədlərə doğru irəliləyişinizi izləmək və qiymətləndirmək də eyni dərəcədə vacibdir. Bunu necə edə bilərsiniz:

• Müntəzəm monitorinq: Hər həftə və ya hər ay məqsədlərinizə nə qədər yaxınlaşdığınızı yoxlayın
• Analitik alətlərdən istifadə: Google Analytics, Google Search Console, Sosial meda analitika alətləri sizə dəqiq data təmin edə bilər
• KPI-ları (Əsas Performans Göstəriciləri) müəyyən edin: Hər məqsəd üçün əsas KPI-ları müəyyənləşdirin və onları izləyin
• Hesabat hazırlayın: Müntəzəm olaraq (məsələn, aylıq) hesabatlar hazırlayaraq irəliləyişinizi sənədləşdirin
• Nəticələri analiz edin: Sadəcə rəqəmlərə baxmaqla kifayətlənməyin, nəticələrin səbəblərini də analiz edin
• Lazım gəldikdə düzəlişlər edin: Əgər hədəflərinizə çatmırsınızsa, strategiyanızı yenidən nəzərdən keçirin və lazımi dəyişikliklər edin

Ümumi Səhvlər və Onlardan Necə Qaçınmalı

SMART məqsədlər təyin edərkən və onları izləyərkən bir sıra yanlış yanaşmalar mövcuddur. Bunlardan necə qaçına biləcəyimizi öyrənək:

• Həddən artıq ambisiyalı məqsədlər: Realist olun. Çox yüksək hədəflər qoymaq motivasiyanı azalda bilər
• Çox az məqsəd qoymaq: Bir və ya iki məqsədlə kifayətlənməyin. Müxtəlif aspektləri əhatə edən bir neçə məqsəd təyin edin
• Ölçülə bilməyən məqsədlər: Hər zaman ölçülə bilən meyarlar daxil edin
• Biznes məqsədləri ilə əlaqəsi olmayan hədəflər: Hər bir məqsədin ümumi biznes strategiyanıza necə xidmət etdiyini düşünün
• Uğursuzluqdan məyus olmaq: Hədəfə çatmasanız da, öyrəndiklərinizi qiymətləndirin və növbəti dəfə üçün strategiyanızı təkmilləşdirin

📊 Strategiyalarınzda istifadə edə biləcəyiniz PESTEL Analiz və SWOT Analiz metodlarını kəşf edin.

SMART Məqsədlər ilə Rəqəmsal Marketinq Uğurunuzu Artırın

SMART məqsədlər rəqəmsal marketinq strategiyanızın əsas hissəsidir. Onlar sizə aydın istiqamət verir, motivasiyanı artırır və uğurunuzu ölçməyə imkan yaradır. SMART prinsiplərini tətbiq edərək:

• Daha fokuslanmış kampaniyalar yarada bilərsiniz
• Resurslarınızı daha səmərəli istifadə edə bilərsiniz
• Komanda üzvlərinizi daha yaxşı istiqamətləndirə bilərsiniz
• ROI-nizi (İnvestisiya Gəlirliliyini) artıra bilərsiniz
• Daim öyrənə və təkmilləşə bilərsiniz

Unutmayın ki, SMART məqsədlər statik deyil. Bazar şərtləri, müştəri davranışları və texnologiya dəyişdikcə, siz də məqsədlərinizi uyğunlaşdırmalısınız. Müntəzəm olaraq məqsədlərinizi nəzərdən keçirin və lazım olduqda yeniləyin.

Nəticə

Rəqəmsal marketinq strategiyanızda SMART məqsədlərdən istifadə etmək, uğurlu olmaq üçün atılan ən önəmli addımlardan biridir. Spesifik, Ölçülə bilən, Əldə edilə bilən, Uyğun və Zamana bağlı məqsədlər təyin edərək, siz daha effektiv kampaniyalar yarada, resurslarınızı daha səmərəli istifadə edə və daha yaxşı nəticələr əldə edə bilərsiniz.

SMART məqsədlər sizə aydın bir yol xəritəsi verir, komandanızı motivasiya edir və irəliləyişinizi ölçməyə imkan yaradır. Onları müntəzəm olaraq izləmək, qiymətləndirmək və lazım gəldikdə düzəlişlər etmək də eyni dərəcədə vacibdir.

SMART məqsədləri rəqəmsal marketinq strategiyanızın ayrılmaz bir hissəsinə çevirin və şirkətinizin onlayn uğurunu yeni zirvələrə qaldırın.